Þinghúsbréf 18, meira ICESAVE

Við í Fjárlaganefnd höfum nú haft Icesave til umfjöllunar í nærri átta vikur.  Þetta mál er víst með því þyngra og flóknara sem þingið hefur fengist við og þar sem ég sit einnig í Efnahags- og skattanefnd sem einnig fjallaði um vissa hluti Icesave þá er þetta farið að flæða út um eyrum á mér.  Málið snýst um að ríkisstjórnin veiti ríkisábyrgð á lán frá Bretum og Hollendingum, lán sem verður lánað hinum íslenska "Tryggingasjóði innstæðueigenda og fjárfesta" til þess að greiða innlánstryggingar vegna innlagna á Icesave reikningana.  Þar sem Tryggingasjóðurinn er nánast gjaldþrota þýðir þetta að að frádregnum eignum í þrotabúi Landsbankans muni greiðslan á lánunum lenda á íslenskum almenningi.  Í stuttu máli, velta á skuldum auðmanna yfir á almenning.

Strax varð ljóst að málið færi ekki óbreytt í gegnum þingið þó það hafi verið eindregin ósk Jóhönnu og Steingríms sem raunar ætluðu að koma því upprunalega í gegn sem trúnaðamáli sem mátti ekki upplýsa um.

Mörgum þingmönnum ofbauð og m.a. fjórum VG liðum, þeim Ásmundi Einari Daðasyni, Guðfríði Lilju Grétarsdóttur, Lilju Mósesdóttur og Ögmundi Jónassyni, sem spyrntu fast við fótum.   Nokkrir þingmenn úr öllum flokkum náðu að mynda þverpólitískan hóp sem settist niður við að semja fyrirvara við ríkisábyrgðina.  Þessi hópur sem samanstóð af mér, Lilju Mósesdóttur úr VG, Pétri H. Blöndal og Tryggva Þór Herbertssyni úr Sjálfstæðisflokknum, Eygló Harðardóttur og Höskuldi Þórhallssynini úr Framsóknarflokknum og Sigríður Ingibjörg Ingadóttir úr Samfó leit einnig við og lagði hópurinn fram breytingartillögur um efnahagslega fyrirvara við frumvarpið sem tryggja það að greiðslur af lánunum skerði ekki lífskjör beint heldur komi úr framtíðar hagvexti, þ.e. af aukningu landsframleiðslunnar ef einhver verður.  Ef engin aukning verður á landsframleiðslunni greiðum við ekki neitt.  Fyrirvararnir tryggja einnig gegn gengisáhættu og gegn lélegum endurheimtum á eignum Landsbankans.

Aðrir fyrirvarar eiga m.a. að tryggja að dómstólaleiðinni verði haldið opinni.  Eins komst inn grein nánast beint úr stefnuskrá Borgarahreyfingarinnar sem lýtur að því að stjórnvöldum er gert að leita aðstoðar hjá yfirvöldum nágrannalanda til að finna út hvað varð um alla peningana sem lagðir voru inn á reikningana og freista þess að ná þeim til baka eða láta stofnendur eða ábyrgðarmenn Icesave skuldbindingana bera það tjón sem upp á vantar.  Sjá breytingartillögurnar hér.  ég skrifaði undir nefndarálitið "með fyrirvara" eins og sagt er en það þýðir að ég get einnig samþykkt hvaða nýjar breytingartillögur sem fram koma og greitt atkvæði samkvæmt því.

Þetta var langur og harður slagur þar sem flestir stjórnarliðar vildu hafa þessa fyrirvara vægt orðaða til að "stuða ekki Breta og Hollendinga" þannig að þeir felli samningana.  Hvað um það, breytingartillögurnar voru ræddar á þinginu í tvö daga í s.k. "annari umræðu" (öll frumvörp fara í gegnum þrjár umræður) og í þeim umræðum kom í ljós að hugsanlega þarf að tryggja þessa fyrirvara betur.  Málinu var því vísað aftur til Fjárlaganefndar milli annarar og þriðju umræðu og funduðum við um það í gær laugardag og tökum svo aftur til við það á mánudaginn.

Við í þingflokknum fluttum okkar ræður og ég tvær, eina á fimmtudaginn og eina á föstudaginn vegna þeirra nýju vafaatriða sem komin voru upp.

Hér er fyrsta ræðan mín og andsvör Eyglóar Harðardóttur og Tryggva Þórs Herbertssonar við henni og andsvör mín við þeim:

http://www.althingi.is/altext/hlusta.php?raeda=rad20090820T123800&horfa=1

http://www.althingi.is/altext/hlusta.php?raeda=rad20090820T130538&horfa=1

http://www.althingi.is/altext/hlusta.php?raeda=rad20090820T130654&horfa=1

http://www.althingi.is/altext/hlusta.php?raeda=rad20090820T130814&horfa=1

http://www.althingi.is/altext/hlusta.php?raeda=rad20090820T131031&horfa=1

http://www.althingi.is/altext/hlusta.php?raeda=rad20090820T131254&horfa=1

http://www.althingi.is/altext/hlusta.php?raeda=rad20090820T131400&horfa=1

http://www.althingi.is/altext/hlusta.php?raeda=rad20090820T131618&horfa=1

Hér er svo seinni ræðan mín og andsvör Unnar Brár Konráðsdóttur við henni:

http://www.althingi.is/altext/hlusta.php?raeda=rad20090821T194646&horfa=1

http://www.althingi.is/altext/hlusta.php?raeda=rad20090821T195642&horfa=1

http://www.althingi.is/altext/hlusta.php?raeda=rad20090821T195740&horfa=1

http://www.althingi.is/altext/hlusta.php?raeda=rad20090821T195934&horfa=1

http://www.althingi.is/altext/hlusta.php?raeda=rad20090821T200058&horfa=1

Hér eru svo ræður Birgittu og Margrétar:

http://www.althingi.is/altext/hlusta.php?raeda=rad20090820T164500&horfa=1

http://www.althingi.is/altext/hlusta.php?raeda=rad20090821T164133&horfa=1

Athugasemdir

[Magnús Sigurðsson, 23.8.2009 kl. 22:32]

Hvort sem málið er einfalt eða flókið, þá hafa stjórnmálamenn tekið þá ákvörðun að vinna að hagsmunum peningaaflanna og hella skuldum eikabanka yfir íslenskan almenning til að þóknast hinu svo kallaða "alþjóðasamfélagi". 

Hafa ekki flestir íslenskir stjórnmálamenn tapað einfaldleika málsins?

[Guðbjörn Jónsson, 23.8.2009 kl. 23:56]

Ég hef nú svo oft sagt að grunnurinn að þessum Icesave samningum er rangur, þar sem Landsbankinn er ekki ennþá kominn í þrotameðferð.

Fyrst gamli Landsbankinn er enn starfandi, stjórnað af skilanefnd, var það auðvitað skilanefndin sem átti að leita samninga, eða kerfjast greiðslustöðvunar, sem upphafi að gjaldþrotameðferð.

Það var frumhlaup af ríkisstjórninni að taka fram fyrir hendur skilanefndarinnar, með því að beina kröfunum beint að skattgreiðendum, án þess að kröfueigendur gerðu eina einustu tilraun til að innheimta eignir sínar frá bankanum sjálfum.

Þetta mál er allt hið vandræðalegasta og sýnir glögglega hve lítill varnarvilji er í þingmönnum ríkisstjórnarinnar, því þeir hafa fram til þessa komið fram sem óvitar, að undanteknum fáeinum einstaklingum, sem þó láta flestir lítið á sér bera.

[Jón Sveinsson, 24.8.2009 kl. 00:13]

 Sæll Þór Saari

 þessir fyrirvarar eru skrum með ólíkindum,Að þingmen skulu vera að hrærast í svona þvælu því samningurinn er það viðrjóðasta plagg sem skrifað hefur verið, þeir þingmen sem eru þjóðhollir myndu ekki ræða þessa fyrirvara heldur segja þetta er þjóðarskömm og aðeins landðsráðslíður mun samþigga hann.

[Jóhannes Laxdal Baldvinsson, 24.8.2009 kl. 00:46]

Sagan mun dæma þennan gjörning allan.  En það er lýðum ljóst að Steingrímur var undir þrýstingi frá AGS og evrópuaðildarsinnum Samfylkingarinnar.  Þetta eina mál hefur tekið alltof langan tíma og komið í veg fyrir aðrar ekki síður mikilvægar ráðstafanir í efnahagsmálum. Aðeins er hægt að leiða líkum að óbeinu tjóni af þessum töfum en víst er að þjóðfélaginu er að blæða út

[JR (IP-tala skráð) 24.8.2009 kl. 00:47]

Þór.

Þar sem ég er einn af kjósendum ykkar hreyfingar vil ég bara segja við þig. Mikið er ég ósáttur við störf ykkar !  Þið þrjú hafið svikið það sem lagt var upp með hjá þessari hreyfingu !  Jú, að fara með áherslur hreyfingarinnar inn á þing !  Hvers vegna þú fékkst með þér fólk til að svíkja það sem búið var að segjast ætla að gera ? 

Hvers að ykkur, egó ???

Ég veit þetta allt betur eða ykkur kemur bara ekkert við hvað ég er að gera ???

Þú varst efnilegur í kosnigabaráttunni , en núna verstu vonbrigði sem um getur í pólitík sem ég man eftir !

[Jóna Kolbrún Garðarsdóttir, 24.8.2009 kl. 01:04]

Er ekki grundvallaratriði að þessir fyrirvarar á IceSlave samninginum eru einhliða?  Ekki þarf að leita samþykkis Breta og Hollendinga?  Það á að keyra þetta frumvarp í gegn hvað sem það mun kosta okkur skattgreiðendur á komandi árum? 

[sigurvin (IP-tala skráð) 24.8.2009 kl. 02:21]

Sæll Þór

Sem kjósandi og félagi í BH vil ég bara segja að ég er mjög sáttur við ykkar störf. ESB mistökin eru fyrirgefin og gleymd.

Ég hélt að öllum væri ljóst að icesave málið verður ekki leyst öðruvísi en með samningum. Þið hafið unnið frábært starf við þessa fyrirvaragerð og gangi málið upp með þessum hætti er það sennilega sú skásta leið sem við eigum möguleika á í stöðunni. Verði samningurinn samþykktur er tjónið orðið áþreifanlegt og kominn grundvöllur fyrir skaðabótamáli. Með aðstoð Breta ætti að vera hægt að ná í töluverða fjármuni uppí tjónið. Fyrst litlu apparati sem skilanefnd tekst að fá eignafrystingu í fjarlægum heimsálfum ætti það ekki að vera mikið mál fyrir yfirvöld, lögreglu, ssaksóknara.

Þetta sumarþing hefur ekki verið neitt venjulegt þing og fráleitt að dæma ykkar störf af því. Mín afstaða hefur ekkert breyst frá upphafinu, tel að ykkar vera á þingi sé þjóðinni nauðsynleg. Tel ykkur vera afl sem getur náð árangri hvað varðar lýðræðisumbætur, í baráttunni gegn spillingu og bind miklar vonir við nýtt upphaf.

...og kærar þakkir fyrir þinghúsbréfin!

[Kristján (IP-tala skráð) 24.8.2009 kl. 11:39]

Þór?!

Ég borga ekkert Icesafe! Punktur!

Ég vona að þú verðir ekki kallaður Þór Sori í framtíðinni miðað við að tvö "aa" eru borin framí dönsku sem å eða hljómrétt: o.

En kannski ertu af finnskum eða eistneskum ættum.

Samt sem áður ert þú Sori í mínum huga ef þú samþykkir Icesafe ríkisábyrgð og ég mun einnig líta á þig sem landráðamann og samverkamann þeirra!!!

Ég mun höndla þig eins og hvern annan slíkann. 

[Eva Sól (IP-tala skráð) 24.8.2009 kl. 12:34]

AF ummælum sumra manna hér er eins og Þór Saari einn ráði hvernig Icesave málið fer. Ég tel að Kristján ætti að fara með skammir sínar aðeins ofar í valdastigann, t.d. til þess sem hefur barist ötullega fyrir samþykki óbreytts samnings eins og Steingríms eða þá Jóhönnu. Sárir kjósendur hafa nú líklega meiri ástæðu til að segja sitt hér á síðunni. Ég er og hef verið MJÖG sátt við störf Þórs og þakklát fyrir þessa pistla sem gefa mér smá innsýn í hvað fer fram á Alþingi.

Takk fyrir,

sáttur kjósandi

[Gísli Baldvinsson (IP-tala skráð) 24.8.2009 kl. 12:49]

Það er ákveðið hugrekki að halda úti bloggsíðu og vera þingmaður. Ég tel það reyndar þakkar- og virðingarvert. Það skýrir mál og afstöðu. Þið í Bhr. hafið valið þá leið að vinna ekki sem þingflokkur, sem er áhugaverð tilraun. Þannig er hver þingmaður með sína skoðun og sýn. Hættan er sú að atkvæðin hrynji við slík vinnubrögð. Ekki get ég samt séð hvernig þú ætlar að greiða atkvæði við 3ju umferð. Þú svarar því.

[Kristján (IP-tala skráð) 24.8.2009 kl. 12:53]

Mér skilst núna að saari þýði eyja á finnsku og þar með er það á hreinu og þú þarft ekki að svara því.

En það breytir ekki því sem ég sagði!! 

[Sigurður Sigurðsson, 24.8.2009 kl. 13:06]

Sæll Þór Saari.

Mig langar til að leggja fyrir þig 2 spurningar:

1)  Ertu 100% viss um að þessir fyrirvarar, sem fjárlaganefnd samþykkti, muni halda þegar og ef á reynir fyrir brezkum dómstólum ?

2)  Er það vonlaus leið að segja einfaldlega NEI við þessum Icesave samningi, heimta frekari viðræður við Breta og Hollendinga um aðra aðkomu að málinu, nú eða láta einfaldlega á það reyna hvort viðsemjendur muni standa við hótanir sínar um fjármálalegar þvingunaraðgerðir ??

Þú fyrirgefur, en mín skoðun er sú - og ég held að mikill meirihluti Íslendinga sé mér sammála - að við berum ekki ábyrgð á þessum skuldum fjárglæframanna í útlöndum og eigum þ.a.l. alls ekki að láta nágrannaþjóðirnar þvinga okkur til þessara nauðasamninga.

[Arnór Valdimarsson (IP-tala skráð) 24.8.2009 kl. 16:48]

Sæll þór. Ég er stoltur af þér. Treysti þér 100% til að klára þetta Iceslave mál, og á þann hátt að öruggt sé að fyrirvararnir haldi.

Vona reyndar að  þeir verði til þess að, samningnum verði hafnað af Br og Holl. Og að réttur okkar til að reka þetta fyrir dómi viðurkennist. Allavega ætti heimurinn að geta virt málið rækilega fyrir sér og séð hversu mikil fjarstæða upphaflegi samningurinn var og nauðung, og við sennilega blórabögglar meingallaðra ESB ruglugerða sem ekki má láta reyna á vegna hins slæma fordæmis.

[Sigurður Þórðarson, 24.8.2009 kl. 19:56]

Þakka þér Þór fyrir þetta upplýsandi þinahúsbréf. Ég vil líka þakka þér fyrir störf þín á þingi, það hefur sjaldan eða aldrei verið mikilvægara að hafa þingmenn sem líta á það sem skyldu sína að standa vörð um land og þjóð.  Þetta er í fyrsta skipti sem ég er farinn að lesa þingtíðindi með miklum áhuga.  En mikið rosalegur dóni er þessi maður sem kallar sig Kristján. Afi minn sem var skynsemdarmaður  sagði eitt sinn: "Svo skal leiðum svara að ansa honum engu" Ég geri hans orð að mínum.

[Sævar Einarsson, 24.8.2009 kl. 21:38]

Sæll Þór.

Þar sem ég fékk ekkert svar við síðustu færslunni þinni þá spyr ég aftur: Það sem ég rita núna hefur mikið að gera með Icesave ásamt skilanefndum, fjármálafyrirtækum og síðan en ekki síst alþingismönnum og ráðherrum fyrir bankahrun. Mig langar að spyrja þig, hefur þér eða engum í flokknum dottið í hug að spyrja ráðherra hvers vegna ekki sé óskað eftir aðstoð frá Europol og Interpol til að rannsaka í öll skúmaskot hvað fór úrskeiðis og ástæðan fyrir því að ég er að spyrja að þessu er sú að ég treysti ekki sérstökum ríkissaksóknara og eða þingmönnum og ráðherrum fyrir bankhrun og ég held að það komi aldrei upp á yfirborðið nema að fá aðstoð frá  Europol og Interpol.

[sandkassi (IP-tala skráð) 24.8.2009 kl. 23:30]

Takk fyrir þetta Þór minn.

[Þór Saari, 25.8.2009 kl. 04:04]

Já hann Kristján er dóni, en svona eru sumir bara.  Hvað varðar Sævarinn þá má lesa úr færslunni minni hér að ofan eftirfarandi:

"Eins komst inn grein nánast beint úr stefnuskrá Borgarahreyfingarinnar sem lýtur að því að stjórnvöldum er gert að leita aðstoðar hjá yfirvöldum nágrannalanda til að finna út hvað varð um alla peningana sem lagðir voru inn á reikningana og freista þess að ná þeim til baka eða láta stofnendur eða ábyrgðarmenn Icesave skuldbindingana bera það tjón sem upp á vantar."

Svo má lesa í breytingartillögunum orðrétt:

8. gr. 

Endurheimtur á innstæðum.

                    Ríkisstjórnin skal þegar í stað grípa til allra nauðsynlegra ráðstafana sem þarf til að endurheimta það fé sem safnaðist inn á Icesave-reikningana. Í þeim tilgangi skal ríkisstjórnin fyrir 15. október 2009 hafa frumkvæði að samstarfi við þar til bæra aðila, m.a. yfirvöld í Bretlandi, Hollandi og Evrópusambandinu, og óska aðstoðar þeirra við að rekja hvert innstæðurnar af Icesave-reikningunum voru fluttar. Ríkisstjórnin skal fyrir árslok 2009 semja áætlun um hvernig reynt verður að endurheimta það fé sem kann að finnast.

                    Í því skyni að lágmarka ríkisábyrgð samkvæmt lögum þessum skal ríkisstjórnin einnig gera ráðstafanir, í samráði við þar til bæra aðila, til þess að þeir sem kunna að bera fjárhagsábyrgð á þeim skuldbindingum sem stofnast hafa vegna Icesave-reikninganna verði látnir bera það tjón.

[Magnús Sigurðsson, 25.8.2009 kl. 08:54]

Þór, mig undrar ekki að icesavemálið sé orðið þungt og flókið, af svari þínu til Sævarsins að dæma; ".....hafa frumkvæði að samstarfi við þar til bæra aðila,.....óskaaðstoðar þeirra við að rekja hvert innstæðurnar af Icesave-reikningunum voru fluttar......semja áætlun um hvernig reynt verður að endurheimta það fé....... einnig gera ráðstafanir, í samráði við þar til bæra aðila,......"o.s.fv. þetta er að finna í 8 gr breytingartillögu icesave lántöku á kostnað íslensku þjóðarinnar.

Nú hefur einföld spurning um það hvort almenningi ber að taka ábyrgð á skuldum einkabanka orðið spurningunni um það hvernig þjóðin á að óska og reyna að fá að borga skuldina. 

Áhyggjur þingmanna virðast fyrst og fremst snúast um það hvernig almenningi verði gert kleyft að borga icesave, me svona nokkurs konar "greiðsluaðlögun" að hætti norrænu velferðarstjórnarinnar.  Þið virðist vera búnir að missa sjónir á réttlætinu.