Þinghúsbréf 19

Síðast liðinn þriðjudag, þann fræga dag 6. október og ár frá hruni, var flutt munnleg skýrsla forsætisráðherra um "Efnahgshrunið og endurreisnina" eins og það hét.  Þarft framtak af þinginu og forsætisráðherra og mjög ánægjulegt að heyra málflutning hennar og hversu ákveðin hún virðist í að það fari hér fram alvöru uppgjör við hrunið og sökuldólga þess.  Þessa dags þarf að minnast á þinginu á hverju ári.

Fljótlega sá undir iljarnar á flestum þingmönnum enda margir af þeim á einhvern hátt ábyrgir, annað hvort sem aðilar að þeirri ríkisstjórn sem blekkti okkur öll síðustu mánuðina fyrir hrunið eða aðilar að fyrri ríkisstjórnum sem báru ábyrgð á aðdragandanum.  Hér er það Sjálfstæðisflokkurinn sem ber höfuðábyrgð og hefur valdið þjóðinni meira tjóni en nokkur annar stjórnmálaflokkur í Íslandssögunni.  Framsóknarflokkurinn undir stjórn Halldórs Ásgrímssonar er undir sömu sök seldur og Sjálfstæðisflokkur en þeir í sameiningu bjuggu til Ísland sem var ógeðfellt af græðgi og í raun hálf brjálað.

Fjórflokkurinn reyndi að krafsa í bakkann og kenna hver öðrum um hrunið en niðurstaða mín að loknum umræðum dagsins var að hrunið og ástæður þess hafi einfaldlega farið fram hjá flestum þingmönnum.  Söguskoðun þingmanna Samfylkingarinnar var einnig áhugaverð en þar reið Björgvin G. Sigurðsson á vaðið en hann var viðskiptaráðherra og þar með ráðherra bankamála allt frá árinu 2007 og var svo gerður að formanni þingflokks Samfylkingarinnar að loknum síðustu kosningum.  Staða sem hjá hinum hefðbundna fjórflokki er ráðherra ígildi.

Endurreisnar umræðan var áhugaverð þó dapurleg væri og athyglisvert var að sjá hvað áliðnaðurinn hefur náð miklum tökum á þingmönnum Sjálfstæðisflokksins og sumum þingmönnum Samfylkingar og Framsóknarflokks.  Hér ekki fyrir alls löngu voru það fjármálafyrirtækin og útrásarvíkingar sem stýrðu ræðum þeirra en nú virðast álfyrirtækin vera orðin æðsti prestur.

Það er ekki næg orka fyrir Helguvík á suð-vestur horninu en samt á að byggja álver.  Auka á framleiðsluna í Straumsvík um 40.000 tonn á ári með heilli virkjun, Búðarhálsvirkjun, og talið er að aukningin kalli á fjölgun starfsmanna um tólf, segi og skrifa tólf.  Ekki er heldur næg orka við Þeistareyki fyrir álveri á Bakka en samt á að byggja það.  Þessi umræða er einfaldlega orðin svo fáranleg að það hálfa væri nóg.  Nægir hér að benda á hina frábæru grein Sigmundar Einarssonar í Smugunni 1. október sem allir ættu að lesa.

Óskandi væri að þingmenn þessara flokka bæru meiri virðingu fyrir framtíð almennings og hættu þessu rausi og hugsuðu málið upp á nýtt.  En það er víst þeirra hjartans mál að gefa auðlindirnar.  Mig langar hins vegar að vita hvers vegna.

Hvað um það, ég sagði mína skoðun á málinu og hún er hér.

Lilja Mósesdóttir flutti líka skilmerkilega ræðu um AGS, kjörkuð kona þar á ferð.

Vek svo athygli á nýjum vefmiðli, Svipunni, sannkölluðum alvöru fréttamiðli sem rapportar í anda þeirrar róttæku skynsemi sem við kennum okkur við.  Svipan, það er blaðið.

Athugasemdir

[Sigurður Þórðarson, 12.10.2009 kl. 01:05]

Ég veit ekki hvað Árni Johnsen átti nákvæmlega við þegar hann sagðist hafa tekið á sig sakir fyrir aðra, hann hefði einungis gerst sekur um smávægilegar yfirsjónir en hann myndi fletta ofan af spillingunni ef einhver reyndi að hindra hann í að fara aftur í pólitík.  Hann ætlaði að gefa út bók handritið væri tilbúið og það væri geymt á góðum stað.  Hálfum mánuði síðar sendi dómsmálaráðherra bréf til forseta alþingis og forseta Hæstaréttar Íslands. Þetta var afgreitt samdægurs og því kom bókin ekki út og ég sem var búinn að hlakka svo mikið til.

 Ég veit hinsvegar að þetta tengist ekki því að stjórnmálamenn létu sjóði kaupa ónýt bréf, því það vissu allir. Þetta getur heldur ekki tengst því að sjávarútvegsráðherra einn hafði útbúið reglur sem  voru eins og sniðnar fyrir nótaveiðiskip sem móðir hans hafði þá nýverið keypt, því það vissu allir. Það getur heldur ekki tengst því að sami maður hafði dregið svokallaða n/s þorsklínu suður fyrir Hornafjörð sem leiddi til að fjölskyldufyrirtæki foreldra hans hagnaðist um mörg hundruð milljónir á þáverandi verðlagi, því þetta vissu allir. Og enn síður tengist þetta því að fyrirtæki háaldraðrar móður sama manns keypti hlut í Kaupþingi og fékk lánað fyrir því í Landsbankanum, því ríkisendurskoðun gaf þessu gæðavottorð.  Fáeinum vikum eftir kaupin var fallið frá kvöð um að bréfin skyldu ekki vera seld í tvö ár og gamla konan beið ekki boðana og skipti á bréfunum og bréfum í VÍS og hagnaðist um 700% enda var hún eldklár.

Nei, það var eitthvað allt annað sem Árni ætlaði að segja okkur ef hann hefði ekki fengið uppreisn æru. En hann fékk sem sagt uppreista æru og efndi lofoð sitt.

Samfylkingin vissi þetta og reyndi að njóta meðan á nefi stóð en það stóð stutt við "alltof stutt" "það voru aðrir búnir að vera hér á undan okkur". Ómaklegt hlutskipti eðalkrata sem litu ekki á sig sem Mörlanda, heldur Evrópumenn sem kunna að meta list, rauðvín og svissneska osta.  Örlög Ísþrælana víkja fyrir metnaði þeirra sem stendur til að verða feitir þjónar.

[Þór Gunnlaugsson (IP-tala skráð) 12.10.2009 kl. 09:24]

Sæll nafni

Já það er ekki furða þótt almenningur viti lítið um orkumál eftir lestur greinar Sigmundar og tel ég sjálfan mig þar á meðal og greinilegt að hér er eitthvað verulega aðfinnsluvert í stóriðjuáætlunum Ríkisstjórnarinnar.

Ég er ekki að bera blak á orð Svandísar en hún má vita sem ráðherra að hún þarf að gæta orða sinna sem túlkuð eru á erlendri grundu um leið og þau birtast.

Ég velti alvarlega fyrir mér inngöngu í ESB en þar var ég í fyrstu á frísvæði ályktanna vegna vanþekkingar á innviðum ESB en hef frekar einblínt á ástandið á Spáni og Ítaliu ásamt Írlandi en öll eru þau í stórkostlegum vandræðum vegna upptöku Evru.

Bankar riða á barmi gjaldþrots massa atvinnuleysi minni hagvöxtur þar sem ekki er hægt að fella gengið(Evru)og því ekkert annað hægt að gera en herða sultarólina á þegnunum í formi hærri skatta og niðurskurðar. Bara Írar verða að taka á sig sem skattgreiðendur 2600 milljarða eða 1.4 milljónir á hvert mannsbarn vegna skuldavafninga sem útrásarbankamenn þar í landi gerðu alveg eins og hér en með öðrum formerkjum og þetta er fyrir utan öll önnur útgjöld til reksturs á þjóðinni og þar þarf að skera niður og það harkalega.

Ég hef því velt fyrir mér þegar Lissabon sáttmálinn verður fullgildur að þá verði Alþingi óþarft því matseðlar komi frá Brussel og nægilegt sé að hafa framkvæmdastjóra hjá þjóðinni í stað ráðherra þar sem við fáum engu ráðið um tilveru okkar hér á landi en ég er ekki að segja að við fengjum einskonar framfærslustyrki fyrir nýtingu á auðlindum okkar heldur að sjálfstæði okkar sem þjóðar væri ógnað.

Hermann Þórðarson ritar í MBL í dag merkilega grein um tilvist okkar í Nato sem kostar okkur hunduði milljóna á ári í meðlimagjald að semja beint við Rússa um lán gegn samvinnu við þá um Norðurslóða dæmið og hætta í NATO.  Það myndi valda mega jarðskjálfta´innan ESB og USA og gott innlegg hjá þjóð sem haldið er í hreðjartaki

[Þór Gunnlaugsson (IP-tala skráð) 12.10.2009 kl. 11:04]

Sæll aftur nafni

Kl.0955 var 5 mínútna þáttur á Bloomberg fréttaveitunni og því bætt við að við værum mjög nálagt þjóðargjaldþroti.Auglýst var Bláa Lónið og viðtal við Ásmund Stefánsson.  Þetta var dapurleg að hlusta á en George Soros auðjöfur hefur tekið upp hanskann fyrir Lettland og sagði að IMF og ESB ættu að koma landinu til hjálpar á myndarlega hátt en því miður minntist hann ekki á okkur blessaður en það sem kallinn segir eru nánast ígildi laga fyrir fjárfesta.