Þinghúsbréf 9, fyrsta frumvarpið

Þetta var dagurinn sem Borgarahreyfingin lagði í fyrsta sinn hönd á plóginn í framlagningu frumvarps á Alþingi.  Til hamingju félagar.

Hér er um að ræða frumvarp Lilju Mósesdóttur úr VG og fleiri, þ.á.m. Borgarahreyfingarinnar, sem tekur á því mikla vandamáli sem verður þegar húsnæði fólks lækkar það mikið í verði að það stendur ekki lengur undir veðkröfunni.  Eins og staðan er í dag þá er hægta að ganga á allar aðrar eignir fólks til fullnustu kröfunnar sem og halda því á vanskilaskrá í allt að fimmtán ár. 

Frumvarp Lilju o.fl. "Frumvarp til laga um breytingu á lögum um samningsveð nr. 75/1997",  tekur á þessu með þeim hætti að ekki verður hægt að ganga að skuldara fyrir hærri upphæð en samningsveðinu og ekki verður hægt að halda úti kröfum á viðkomandi vegna þess sem ekki innheimtist.  Íbúðaeigendur geta einfaldlega skilað lyklunum til lánveitenda og byrjað upp á nýtt án þess að eiga á hættu að verða hundeltir með tölvurnar sínar og aðra heimilismuni og verða jafnvel útilokaðir frá bankakerfinu í fimmtán ár.

Sérstaklega ánægjulegt var þetta fyrir mig þar sem þessi tíðindi bar upp á afmælið mitt og var kærkomin afmælisgjöf að fá þetta á dagskrá í dag.  Svo er bara að vona að Allsherjarnefnd sem fær málið til meðferðar taki á þessu máli af skilningi.  Hér eru svo umræðurnar um málið:

http://www.althingi.is/altext/hlusta.php?lidur=lid20090609T155134&end=20090609T160954&horfa=1

Að öðru leiti var dagurinn stórfurðulegur vegna sameiginlegs nefndarfundar Efnahags- og skattanefndar og viðskiptanefndar í morgun þar sem fulltrúar og forstjóri Fjármálaeftirlitsins neituðu að láta Alþingi í té upplýsingar um verðmat eigna gömlu og nýju bankana sem skiptir gríðarlegu máli þar sem það verður ríkið, þ.e. almenningur, sem mun leggja fram peninga (235 milljarða) til að fjármagna bankana upp á nýtt.  Framkvæmdavaldið ætlaðist einfaldlega til þess að Alþingi legði fram þetta fé án þess að fá upplýsingar um málið og er skólarbókardæmi um háttsemi sem ekki er hægt að líða.  Mér og fleirum fannst þessi fundur leiðast út í tómt rugl og við einfaldlega yfirgáfum fundinn.  Það verður svo nefndarformanna og væntanlega Viðskiptaráðherra að finna leið út úr þessu spaghettíi en þetta var einhver sá al vitlausasti fundur sem ég hef verið á.

 Góðar stundir.

 

 

Athugasemdir

[Hlynur Hallsson, 9.6.2009 kl. 23:01]

Takk fyrir þessi þinghúsbréf Þór og til hamingju með frumvarpið.

Bestu kveðjur,

[Ragnar Eiríksson, 9.6.2009 kl. 23:17]

Já til hamingju með afmælið og frumvarpið - það er efalítið réttlætismál sem þið eruð þarna að flytja/styðja.

Er það virkilega svo að einhverjir embættismenn geti skellt hurðinni á nefið á þingmönnum og neitað að gefa upplýsingar.    Þurfið þið ekki bara að hafa lögfræðing til að berja á þessum "hálfvitum".     Það hlýtur að vera vitlaus/heimskulegur fundur þegar kjörnir fulltrúar þjóðarinnar með ábyrgðartilfinningu ganga af fundi.   Ég segi ekki meira!

Baráttukveðja og þakkir fyrir þingbréfin,

Ragnar Eiríksson 

[TH (IP-tala skráð) 10.6.2009 kl. 00:11]

Ég vona innilega að þetta frumvarp verði að lögum. Það á ekki að vera löglegt að leggja fólk að veði eins og nú er gert.

Haldið áfram að vera tortryggin og gagnrýnin á uppfærslurnar í þinghúsi fáránleikans.

Baráttukveðjur, TH

[Jóna Kolbrún Garðarsdóttir, 10.6.2009 kl. 01:02]

Það er réttlætismál að þetta frumvarp verði að lögum.  Til hamingju með afmælið. 

[Brjánn Guðjónsson, 10.6.2009 kl. 01:10]

frábært! vonandi að fleiri en færri þingmenn sjái réttlætið og geri þetta að lögum.

[Þórður Björn Sigurðsson, 10.6.2009 kl. 01:44]

Hreinlega til fyrirmyndar hjá ykkur öllum sem að frumvarpinu standið.  Að veð takmarkist við þá eign sem sett er að veði hefur verið eitt af baráttumálum Hagsmunasamtaka heimilanna: http://www.heimilin.is/varnarthing/about/tilloegur-samtakanna

Þinghúsbréfin eru kærkomin.  Takk fyrir þau og til hamingju með daginn.

[Sigurður Hrellir, 10.6.2009 kl. 07:12]

Til hamingju með afmælið Þór og fyrsta frumvarpið. Þið eruð Borgarahreyfingunni og Alþingi til sóma.

[Stefán Þ. Þórsson (IP-tala skráð) 10.6.2009 kl. 08:57]

Frábært hjá ykkur! Það væri algjört hneyksli ef þetta verður ekki að lögum. Nú geta margar fjölskyldur séð fram á að það sé hægt að byrja upp á nýtt, með hreint borð.

Kv, Stefán Þ.

[Héðinn Björnsson, 10.6.2009 kl. 08:59]

Þið standið ykkur :)

[Baldvin Björgvinsson, 10.6.2009 kl. 08:59]

Úff, hvenær verður sjálftökuliðið fjarlægt úr bankakerfinu?

[Páll Höskuldsson, 10.6.2009 kl. 09:39]

Heill og sæll gamli góði skólabróðir. Og til hamingju með afmælið.

Það eru margir hérna úti sem binda miklar vonir við ykkur í Borgarahreyfingunni Þór. Þetta frumvarp er alveg til fyrirmyndar hjá ykkur.

[HallfríðurÞórarinsdóttir (IP-tala skráð) 10.6.2009 kl. 10:06]

Frábært og til hamingju með frumvarpið og afmælið

[Guðmundur Bogason, 10.6.2009 kl. 10:19]

Til hamingju með afmælið.

Frábært frumvarp, þið eruð sannarlega að vinna þá vinnu sem maður reiknaði með.  Vafalaust verður þetta frumvarp tafið eða ekki stutt af þeim þingmönnum sem hafa það annarlega hlutverk að vernda fjármagnseigendur og hrunið bankakerfi. 

[Steingrímur (IP-tala skráð) 10.6.2009 kl. 10:23]

Frábært frumvarp. Nokkuð sem heilbrigð skynsemi kallar á. Gott að fá svona fréttir beint af gangi mála.

[Gustav Pétursson (IP-tala skráð) 10.6.2009 kl. 10:43]

Til hamingju með frumvarpð. Ég er einn af þeim sem bjóst ekki við miklu af ykkur í kosningunum heldur leit á ykkur sem enn eitt eins málefna framboðið sem myndi lognast út af í getuleysi en þið hafið aldeilis komið mér skemmtilega á óvart.

[Páll Geir Bjarnason, 10.6.2009 kl. 11:01]

Þetta frumvarp hljómar réttlátt og skynsamlegt.

[Jakob Þór Haraldsson (IP-tala skráð) 10.6.2009 kl. 12:37]

Þið sem eruð að leggja fram þetta FRÁBÆRA frumvarp BERIÐ AF og standið ykkur mjög vel - til hamingju með gærdaginn - gangi þér ávalt allt í haginn....

kv. Heilbrigð skynsemi

[Baldur (IP-tala skráð) 10.6.2009 kl. 12:40]

Ágætis frumvarp. En er ekki betra að fella niður skuldir að einhverju marki svo fólk geti búið í húsinu áfram. Að skila lyklinum er allt of vænlegur kostur fyrir allt of marga og þessi leið yrði án efa dýrari.

[HH (IP-tala skráð) 10.6.2009 kl. 13:03]

Hvernig er það Þór skilur hún Birgitta ykkar efni þessa frumvarps ?

[Ólafur Garðarsson (IP-tala skráð) 10.6.2009 kl. 13:11]

Þetta frumvarp er mjög í anda krafna Hagmunasamtaka heimilanna. Mjög jákvætt og vonandi verður það að lögum.

[DoctorE (IP-tala skráð) 10.6.2009 kl. 17:42]

Flott hjá þér.

Segðu mér, á ekki að leggja fram frumvarp um að taka afæturnar í ríkiskirkju af spena ríkisins... þeir taka þúsundir milljóna á hverju ári... höldum skattinum og setjum í velferðarmál, ekki veitir af
Í því frumvarpi ættu allir að afskrást úr kirkjunni, svo geta þeir sem vilja skráð sig aftur inn.

Þetta er mjög mikilvægt og verður að gerast snögglega

[Jón Á Grétarsson, 10.6.2009 kl. 22:41]

Nauðsynlegt og mannlegt frumvarp.  Frábært framtak !  Vona að þetta verði afgreitt sem lög í hvelli og helst afturvirkt til síðasta oktober allavega.

[Rómverji (IP-tala skráð) 11.6.2009 kl. 21:59]

Til hamingju 

[Billi bilaði, 14.6.2009 kl. 22:51]

Mismunun lánveitenda?

Komdu sæll, og takk fyrir þetta. Gott blogg að vanda. Frumvarpið finnst mér gott, svo langt sem það nær. Kannski má það ekki ná lengra, en um það vil ég spyrja þig (og þá sem að þessu standa)...

Bílalán. Er það ekki rétt hjá mér að lánveitendur bílalána (sem óumræðilega hafa veð í bílunum sem lánað er út á, og setur á lánþega t.d. þá skyldu að kaskótryggja umsamda bifreið) munu áfram geta gengið að öðrum eigum lántakenda ef þetta frumvarp verður samþykkt svona? Gæti það verið túlkað sem mismunun á lánaformum? Er eðlilegt að hægt sé að krefjast margfaldrar greiðslu fyrir bíl, en ekki fyrir íbúð?

Kreditkortalán. Er það eðlilegt að kreditkortafyrirtæki geti dælt út kortum og lánaheimildum á fólk (sem kannski er veikt fyrir fé) og vafið það í klafa af skuldbindingum sem síðan fara í innheimtu í öðrum eigum þess?

Varðandi bílalánin, þá er í mínum huga einfalt að láta þau falla undir sömu veðkröfur og íbúðalán í frumvarpi ykkar, og krefjast þess þar með (eins og með íbúðalánin) að ekki sé verið að lána út á hlut sem aldrey getur staðið undir kröfunni, falli hún.

Varðandi kreditkortalánin held ég að það sé mun erfiðara mál - en finnst samt að þar þurfi að setja eðlilegar hömlur á með því að ekki sé hægt að senda fólk í gjaldþrot sem verði við haldið áratugum saman.

Í raun hélt ég, þegar ég las fyrst á þessu bloggi um þetta (þá væntanlega) frumvarp, að það myndi ná meira yfir það að gjaldþrotalög virki hjá einstaklingum eins og fyrirtækjum, að ekki sé hægt að viðhalda kröfum fram yfir gröf og dauða. Ég sé ekki að um það sé að ræða hér fyrir annað en íbúðalán. (Ákveðna útskýringu á því má sjá í gegn um umsögnina með frumvarpinu sem er neðan við það á hlekknum þínum - að það sé auðvelt að gera þetta, því allt séu þetta ríkismál vegna eignastöðu bankanna og stöðu íbúðalánasjóðs.) Verður að vænta frá ykkur (þeim sem standa að þessu frumvarpi, eða Borgarahreyfingunni) frumvarps um víðtækari lagfæringar á gjaldþrotalögum?

ES: Er hægt að beina þessum spurningum á einhvern formlegan hátt til ykkar flutningsmanna frumvarpsins, eða dugir þessi athugasemd hér?

Með góðri kveðju,

Kristján Gaukur Kristjánsson